التاج ده بقى جيه فى وقته لانى كنت عايزه اكتب جديد ولسه الوحى منزلش
أشكر اولا الصديقه المدونه شهيده
والصديق المدون يامن
على تمرير هذا التاج لى
وهذه ورقة الأسئله وكمان معاها الاجابات النموزجيه
_________________________________
أحب شخص لقلبك فى الدنيا؟
من اولها كده اسئله صعبه
لو كان شخص بعينه فهذه اجابه صعبه
لانى بحب العديد من الاشخاص وبنفس العمق
____
انسان مستعد تضحي بحياتك –ركز فى كلمة حياتك- عشانه؟
نفس الاشخاص ولو كانت مصر شخص فبصراحه اتمنى أن تكون روحى فداها
بس طبعا لو كانت روحى دى هتعمل فرق يعنى
يعنى أموت أموت ويحيا الوطن
مش اموت أموت ويموت الوطن
العمر مش بعزءه على الفاضى يعنى
____
।انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟
يا ساتر يارب
ده حتى شارون عمرى ما اتمنت اعمل فيه كده
_______
ما هو:اسم أجمل كتاب كتبه بشر قرأته ومحتفظ به حتى الان؟
الرحيق المختوم عن سيرة أشرف الخلق
لصفى الرحمن المبار كفورى
وأنا أستعرته من زميل عزيز
من أيام الدراسه
ومش عارفه أوصله
ليه
فعشان كده هيفضل فى الحفظ والصون ألى أن أراه
وبينى وبينكم انا شكلى كده هضرب عليه وربنا يسمحنى بقى
وكفايه انى بدعيله
ربنا يكرمك يا محمد يا عشرى
:)
___________
اسم كتاب-كتبه بشر برضة- انت متعلق بيه وبتقرأه كل فترة؟
مجموعة روايات لشكسبير ملمومه فى كتاب قديم عندى
___
اهم جهاز منزلى انت متعلق بيه او بتستخدمه كتير؟
ألى بتواصل بيه مع الناس
الكومبيوتر والتليفون
وأحياناالبوتاجاز اصلى بحب اجرب فى الغلابه اللى عندى فى البيت
:)
___
شىء تحس بالراحة النفسية عندما تنظر اليه؟
المناظر الطبيعيه البعيده عن الزحمه وخصوصا فى اوقات الصبح بدرى او ساعة الغروب
الاشجار و المطره الخفيفه و الطيور والحيوانات الصغيره
النيل و البحر وصوته اما يبقى هادى
بس احيانا بفقد القدره على الاحساس باى جمال
___
مكان تحس فيه بالحنين الى شىء لا تدرى ماهو و ذكريات جارفة الى لاشىء؟
نفس المكان اللى فى السؤال السابق
___
مكان تحس بالراحة عندما تدخله؟
البيت اكتر مكان برتاح فيه
______
اجمل مدينة زرتها داخل مصر؟
رغم انى تقريبا لفيت معظم المحافظات لكن اجملها بالنسبالى
القاهره بموت فيها
____
أجمل مكان طبيعي رأيته داخل مصر؟
لا دى حكايه طويله بس هحكيهالكم
لو زههقتم اقلبوا على السؤال اللى بعده
من كم سنه كده
رحت مع بابا واخواتى وكمان شوية ناس اصحبنا
رحله الى
الصحراء الغربيه عند ناس معارف كانوا عاملين مزرعه فى الجبل
ورى المزرعه دى وعلى مسافه منها الهضبه الغربيه
رحنا ومشينا لحد ماوصلناها وكان هناك ممر رملى بيخترق الهضبه
تابعنا المشى فى الممر الضيق المحاط بالصخور العاليه وصلنا لمنطقه مستديره واسعه كلها محاطه بسلسله متصله من صخور الهضبه الشاهقة الارتفاع و شفت اجمل منظر فى حياتى كلها
شجرة نبء مزدهره بالثمار فى وسط الصحرا والصخور
يعنى الشجره تقريبا تتوسط دائره من الصخور نصف قطرها عشرة امتار
والارضيه رمليه
وكلت احلى نبء بعد رحله طويله
وكمان طلعنا فوق الهضبه وشوفت اجمل تانى منظر
كهف جبلى زى بتاع الافلام كده مبطن بصخور لامعه
تشبه البورسلين ملساء ولكنها طبعا مش مستويه
وكمان كان فيه شوية خفافيش
متعلقه وبعد ما طلعنا من الكهف
استمرنا فى التسلق وشفت بقى منظر بديع من فوق الهضبه
الصحرا بقى والمزارع الجبليه
واحلى جزء كمان فى الرحله واحنا نازلين من فوق الهضبه
وعلى فكره هى مش صعبة التسلق ولا حاجه مش محتاجه احبال والكلام بتاع الافلام
المهم خلينا فى احلى جزء ساعت النزول
كان فى طريق رملى واخد من اعلى لاسفل الهضبه
اخويا مسك ايدى ونزلنا جرى وطبعا مقلكمش على الدحرجه والوقوع
وعلى فكره كانت معانا شمسيه واحنا فوق اول ما فردناها عشان الشمس
اخويا كان هيطير. الهوا فوق شديد جدا
واخر الرحله وفى عز الضهر لاقينا ديب
اه والله ديب من اللى بيعضو دول
الراجل اللى كان معانا فى الرحله كان معاه مسدس
ضرب طلقه كده فى الهوا راح الديب الجبان مشى
:)
ياااه اجمل رحله واجمل مناظر شفها فى حياتى
ووالله الكلام كله جد عشان محدش يقول حاجه
انا كمان اختصرت
....
وكمان سلسلة جبال البحر الاحمر
تحفه
_____
شخصية كارتونية بتحبها؟
ميكى ومينى وبطوط والبطابيط ولاده
وكان فيه سنجابين توؤم بيعملوا مقالب وبيسرقوا الاكل
وتوم وجيرى طبعا
_____
نوع هاتفك المحمول؟
احم نوكيا وتقريبا من جيل
الستات
الى مفردها سته يعنى
:)
_____
سرعة بروسيسور جهازك؟
انا لو اعرف هقول على طول
بس هو مرخم اليومين دول
_____
حجم ذاكرة –هارد- جهازك؟
80
____
المساحه التى تشغلها المواد الاسلامية على جهازك؟
مش عارفه والله بس هى مش كتير
_____________
نفس المساحة السالف ذكرها فى قلبك-الاجابة لنفسك عشان الرياء يا اخواننا-؟
لاء ده سؤال صعب
_____
أهم هدف انت واضعه لحياتك دلوئتى؟
هو ده الهدف
انى الاقى اهم هدف
لانى عندى اهداف كتير
_________
مواصفات فتاة –أو فتى للبنات- الأحلام بالنسبة لى البنات؟
:)
عريض المنكبين مفتول العضلات شنكول الحركات شلولح
:)
أهو ضل راجل ولا ضل حيطه
لا بجد المواصفات والكلام ده بيتغير مع حاجات كتيير بتتغير جوايا
لكن بردو فى شوية ثوابت أرجو انها متتغيرش ومضطرش اتنازل عنها
______
___
صف ما يأتى:شعورك لما بتسمع كلمة مصر؟
اليومين دول
بحس انى عاوزه اعيط
واخدها فى حضنى
____
شعورك لما بتسمع كلام عن اليهود؟
على حسب
اللى بسمعه
______
شعورك لما بتشوف ظابط شرطة؟
بردو على حسب الموقف اللى بشوفه فيه
________
شعورك لما بتشوف الكناس العجوز فى الطريق؟
يعنى فى راى انها مهنه زى كل المهن
بس بتغاظ اوى من اللى بيستخدموا المهنه دى للتسول
وخصوصا اللى بيقولوا
كل سنه وانتى طيبه فى كل الاوقات
بس دلوقتى بغيير منهم لانى عرفت انهم بيقبضوا اكتر منى كطبيبة اسنان فى فترة التكليف
:(
وبالنسبه لوصفه بالعجوز
فالعمل لو كان قادر عليه فوالله ده افضل من انه يتسول
طالما صحته مساعداه وبدعيله ربنا يديله الصحه وميحتجش لحد
اما اللى مش قادر فعلا وبيشتغل فده
بصراحه زى ما اعيب على الحكومه بعيب على الناس المقتدره
مفروض يبقى فيه تراحم بينا
_______
لون البطانية اللى بتتغطى بيها فى الشتاء؟
سؤال مضحك
:)
يعنى اى واحده اهم حاجه انى استخبى تحتها مش من البرد
وبس لاء وكمان من الخوف اصلى معرفش ليه ببقى مرعوبه فى الشتا وكل الافلام الرعب بفتكرها
:)
_____
لون الجورب-الشراب- المفضل لديك؟
الغوامق عشان متتبهدلش بسرعه
____
احساسك اذا داست قدمك فى الطريق على مخلفات اخراج حيوان- *** ولا مؤاخذة-؟
بصراحه ببقى عاوزه احرق نفسى
وبطنى بتوجعنى
ايه بس الاسئله دى
________
_افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟
لو ركزت فى وشه وحاسيت براحه
ببقى مبسوطه وبدعيله بالهدايه
_____
احساس يراودك فى اشارة مرور مغلقة بسبب مسئول كبير؟
ببقى متعصبه جدا وبحسبن
______
التاج ده أمرره
لدوى الصمت
وابو ضحى
وابن مرّ
وياسمين
وطهقانه
والورده السوداء خاصة
وكل من يريد
والامتناع مصرّح بيه والزعل مرفوع
تحياتى للجميع
هناك ٥٧ تعليقًا:
الحمد لله
انا زعلانة منك انتى كماااااااااان
اوى
عشان مش مررتولى التاج
Mohamed A. Ghaffar
اهلا بيك فى اول زياره لمدونتى المتواضعه
وطبعا الحمد لله
تحياتى
الوردة السوداء
لا يا ستى وانا مش قد زعلك منى
وانتى مش محتاجه عزومه
وهمررهولك حالا
بس اوعى تزعلى منى تانى
ارجعى كده للبوست وهتلاقى اسمك منور وعاوزه اجابات نموزجيه
متزعليش بقى
خير الكلام ما قل ودل اجزتي فانجزتي
أنا كمان بمووووت في ميكي و بطوط..بس ايه حكايه التجارب بتاعه البوتجاز ده ايها..ابقي احكيلنا تجربه كده عشان بحب أضحك ع الحاجات دي
تحياتي لكي
عقبال متفرج بعريس ان شاء الله
هيه دنياااااااا
يالا بقا مستنين الوحي لو سمحتي
sendbad
اهلا بيك فى اول زياره
اجازت ايه بس ده انا زى متقول حنفيه واتفتحت
انا حاسه انى رغيت كتييييير
:)
عموما متشكره للزياره والتعليق
ويارب منورنى دايما
تحياتى
micheal
هههههههه
وليه بس الاحراج ده
بص انا عاوزه اقلك ان الحمد لله التجارب كلها لم تؤدى الى الوفاه او التسمم
بس اخواتى بيقول لماما متخليش بنتك دى تدخل المطبخ تانى
معرفش ليه مع انى بدوس فى عمايل كل انواع الاكل
وماما دايما تقلهم خليها تتعلم وبتحطهم قدام الامر الواقع
:)
بس تعرف اليوم ده بياكله مجامله بس لازم يخرجوا من البيت يكله برد تانى او يجيبوا دلايفرى
:(
:(
معرفش ليه محدش بيدينى فرصتى حتى اخواتى
:(
ومتخفش انت مش محتاج انى احكيلك عن التجارب انت لازم تجرب بنفسك ممكن لو رحت اجتماع المدونين الجاى اجبلك حاجه من عمايل ايدى
وانت الكسبان
:)
يلا محدش بياكلها بالساهل
تحياتى لك
Ahmed taher
:)
اهو هو ده بقى التعجييز
:)
فعلا دنيااااا ياحج احمد
:)
وربنا يسهل واقدر اكتب جديد
سلامات
كل تاج وإنتي طيبه يا رانيا
علي فكره إزاي مش كنتي عايزه تعملي كده في شارون ؟؟؟
ياللا سلاماااااااااااااات
reri
وانتى طيبه يا رحاب
يعنى بصراحه انا بكره التعذيب لاى كائن حى انسان حيوان شارون
وكما قال صلاح جاهين
معجبش من اللى يطيق بجسمه العذاب واعجب من اللى يطيق يعذب اخوه
وعجبى
سلامات يا رحووب
واضح من اجاباتك انك حد جميل اوى ودمه خفيف
كل تاج وانتى طيبه
تحياتى
ياااااااه
انجاز
تاني تاج اقراة في نفس اليوم
انجاز والله
مدونتك لذيذة يا رانيا والله
ودمك زي العسل في التاج
انا برضو معجب بالبوتجاز بصورة غير عادية ومش لاقي تفسير
:)
REEMOO
:)
ربنا يكرمك
انتى اللى كلك زوق
وانتى بالصحه والسلامه
أحمد سلامة
تاجين فى يوم واحد
ده فعلا انجاز متقلش لحد لحسن تتحسد
:)
وده شىء يسعدنى انى مدونتى عجبتك
وربنا يكرمك ي أحمد ده بس من ذوقك
انت كمان بتحب البوتاجاز
طيب احنا مجبرين نحبه
انتم ايه الى يحببكم فيه
:)
يلا ربنا يديم حبك للبوتجاز وميحرمكش منه خالص
:)
منورنى ي احمد ويارب دايما
تحياتى
شكرا يا رانيا انك جاوبتي على التاج
أجوبتك حلوة أوي
وكلامك حلو أوي كمان
يللا انا بقى عندي مين أدبسو في التاجات من اليوم فصاعدا
هههه
تحياتي
رانيا
حكايتك عن الرحلة امتعن كتير و اثار خيالى
ايه طبعا انتى مش تقصدى ابو ضحى انا..هو فى واحد تانى اسمه ابو ضحى..كنتش اعرف
ابقى ادينى عنوان مدونته عشان ازوره
شهيده
انا اللى متشكره على التدبيسه
قصدى على تمرير التاج ليا
:)
والحمد لله ان اجاباتى وكلامى عجبوكى
ودبسى برحتك
هيجى اليوم اللى ادبسك فى تاج من اللى هما
وقابلينى لو عرفتى تردى
:)
لا بجد متشكره
ومنورانى يا شهيده
سلام
ابو ضحى
طيب الحمد لله انها عجبتك يا سيدى
...
اه طبعا مش اقصدك انت
ده ابو ضحى تانى خالص
:)
يلا سلام
يا اسلام
حلو التاج
والأجابات أحلى
shermen
ربنا يكرمك يا شبرى
الحمد لله انه عجبك
تحياتى
بصى اولا ميرسى على التاج اللى انا اخدته غصب
ههههههههه
ماعلينا الاغنية لحنان ماضى
كلمات سيد حجاب
الحان عمر خيرت
فى شريط زى الهوا بتاع على الحجار
ادخلى على موقع على الحجار هتلاقيه
اى خدمة
اجابات جميلة
تحياتي
أولا:
أنا مش عارف ليه كل واحد بياخد تاج على دماغه يقوم حاطه في كيس و يمرره للي بعديه
هوا لازم يمرره يعني؟
مش ممكن يسكره؟
دا حتى الواحد يدعيلك مش يدعي عليك
تانيا شكرا جزيلا على زيارتك ليا
لاحظي إني كنت داخل أرد زيارة بس مدونتك طلعت توحفة و الله
و زعلت بجد إني ما جيتش هنا من زمان
أنا طبعا مش عارف إزاي تقدري تاخدي مصر في حضنك؟
يعني مساحة مش قليلة
أنا نفسي
أفهم بس يعني إية شنكول و شلولح
هوا في معاجم جديدة في السوق ولا حاجة؟
تحياتي
تسمحي لي احط انطباعي عن البوست ده - انا مش عارف جيت هنا ازاي -
البوست جميل جدا
وباين انك انسانة كويسة اوي
الوردة السوداء
:)
لا بقى مليش دعوه انا عاوزه التاج بتاعى
:)
بقى هى اغنية حنان ماضى وعلى شريط على الحجار ؟
ما علينا
بس الاغنيه جميله والمؤلف والملحن جامدين
ميغسى بيكو
صاحب البوابــه
طيب انا سعيده انها عجبتك
تحياتى
محمد فوزي آل ربيع
اهلا باول زياره
لا اصل انت مش واخد بالك
الحاجات المسكره بتسوس السنان وانا حاطه شعار لا للتسوس
:)
بس لمحه ظريفه منك
:)
..
يا سيدى ربنا يخليك
تحفه حته واحده
وبعدين اوعى تزعل ملحوقه اديك عرفتها ويارب تنورنى دايما
...
ايه ده انت بجد متعرفش شنكول وشلولح معناهم ايه
ياااه
ده هما دول اهم شرطين عندى
:)
يلا تحياتى ويارب منورنى دايما
Big Code
اهلا بيك فى مدونتى
وطعا يشرفنى هذا الانطباع
وربنا يكرمك يا سيدى
تحياتى
ياراااااااااااااااااااااااانيا
الصوت واصل عندك
اعلي شويه
يارااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااانيا
ها سمعاني
اصلي بعلق من الكويت
ههههههههههههههه
انا اسافر ومكملش اسبوع تقومي تمرريلي تاج
الله يسامحك
بقي انا برضه بتاعه الحجات دي
ماشي مفيش لاب توب
ولا حتي رمش عين
وايه الاسئله والاجابات التحفه دي
بجد تحفه
وحشتييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييني
خلاص بقي علشان هعيط
بحبك والله يا رانيا يا اختي
سلااااااااااااااااااااام
كان معكم محدثتكم
من احر مكان في الارض
الكويت
جىهااااااااااااان
على صوتك شويه مش سمعاكى
حووّل
اهىء اهىء
وانتى كمان يا جى جى وحشااااااااانى
:(
:(
:(
انا بعيط عشان الاب توووووب
:)
ومتعمليش الحركات دى عليا
التاج ده اختيارى للكل
بس انتى غصب عنك هتجاوبيه
والا مش هقبل حتى برمش العين
:)
ربنا معاكى يا جىجى
وانا يا بت بحبك والله
اهىء اهىء
وبابعتلك اغنية
سبنى وراح
مراسلتك من ارض الكنانه
ر.ر
جهينة
انتي حسستيني اننا في القطب الشمالي
دي كلها ساعتين تكوني في مصر يعني اقرب من اسكندرية للقاهرة
اهدي بالله كدة خلينا نركز في غربتنا كويس هههههههههههههه
الاخوة الكرام لأن دورنا هو إظهار الحقيقة وتوعية الناس بها , ولأن ما علمته عن ذلك المجاهد يمثل قيمة عظمى المفترض أن نفتخر بها ونكرمها , لا أن نعتقلها ونسجنها , فإني أطلب منكم رجاءاً أن تساعدونا في بدء حملة الافراج عن شيخ المجاهدين السيد / أبو الفتوح شوشة , وتتمثل الحملة في نشر هذا البوست الجاهز يوم الجمعة الموافق 19/5/2007 , ونشر صور شيخ المجاهدين في جميع المدونات المشاركة – الصور موجودة في مدونتي- , مع توسيع نطاق الحملة لتشمل كافة المدونات التي نستطيع الوصول اليها .. وجزاكم الله خيراً ...
البوست بعنوان
أن تكون أبو الفـتوح شوشة
حملة الإفراج عن شيخ المجـاهدين :
في ظل تلك الهجمة الشرسة التي يتعرض لها كل وطني حر شريف , تتعدى تلك الهجمة هذه المرة خطوطها الحمراء , وتتمادى في غيها المنهجي , لتصطدم برمز من رموز العزة والكرامة في مصرنا الحبيبة , إنه شيخ المجاهدين الذي يربو عمره عن الثمانين , الأستاذ أبو الفتوح شوشة , ورغم ان الكثيرون من قد لا يعرفونه , ربما لأنه ليس بلاعب كرة قدم قديم أو مطرب شهير قد إعتزل ... بل إنه من القلائل الذين ما زالوا أحياء ممن سبق لهم الخروج مجاهدين وقت تقسيم فلسطين عام 48 م , ورغم أن الكل قد تناساه , في غمرة إعتقال نائبي مجلس الشعب من الإخوان المسلمين , وقد تم إعتقاله معهم وقتها بكل القسوة رغم شيخوخته وكبر سنه , إلا أنهم لم يرحموه , ولم تمنعهم كهولته , بل لفقوا له التهمة الشهيرة وهي محاولة قلب نظام الحكم !!! وكأن كهولته وكِبر سنه تسمح له بمجرد التفكير في قلب منضدة و ليس قلب نظام الحكم !!! لكننا اليوم نعلنها إننا لم ننساه , وكيف ننساه ؟؟ وقد حمل لواء الرجولة والعزة آنفاً وخرج ببدنه وماله قاصداً فلسطين ليجاهد عام 1948م اليهود الصهاينة وهو يبغي النصر أو الشهادة , , إنه اليوم له كل الحق علينا في ان ندعمه تماماً , حتى ولو لم يطلب , وحتى ولو لم يعلم , فإننا من منطلق من نمثله من صحافة شعبية , تمارس دورها في تنوير شعوب المنطقة , نعلن اليوم ما الذي يعنيه أن تكون شخصاً كشخص أبو الفتوح شوشة في مصرنا الحبيبة ...
أن تكون أبو الفتوح شوشة فهذا معناه أن تكرم وتصير رمزاً لكرامة الرجال لو كنت في بلد غير مصر ... أما لأنك في مصر ... فهذا معناه أن تصير نزيل أحد السجون وحبيس أحد المعتقلات ...
أن تكون أبو الفتوح شوشة فهذا معناه أن تخرج للجهاد في فلسطين وعمرك لم يتجاوز التاسعة عشر ...فتبلي البلاء الحسن ... ثم تعود لتنال جزائك على جهادك وبدلا من تكريمك يزج بك في السجون 15 عاماً مع الشغل والنفاذ ..
أن تكون أبو الفتوح شوشة فهذا معناه أن تعود من فلسطين راضياً عن نفسك ... راضياً عن جهادك ... راضياً عما فعلته لرفع لواء الذود عن فلسطين ... فلا يرضى عنك النظام ... لتذوق الويل والتعذيب في السجون المصرية ...
أن تكون أبو الفتوح شوشة فهذا معناه أن تخرج من السجن بعد 15 عاماً كاملةً لتمارس رسالتك في البناء والاصلاح من جديد ... بدون أن تتغير قناعاتك أو تتزعزع ثقتك في نفسك ...
أن تكون أبو الفتوح شوشة فهذا معناه أن تترشح في انتخابات مجلس الشعب لعام 1987م ... فيهب جميع أبناء دائرتك لإنتخابك ... بما فيهم أقباط دائرتك بالكامل .... فتنجح نجاحاً باهراً ... ثم يتم حل المجلس لأجل إسكاتك ...
أن تكون أبو الفتوح شوشة فهذا معناه أن تتحصن بحب الله و تحظى بحب الناس لك ...... لكنك في الوقت نفسه تجد أن النظام يُكن الكره لك ... ويعتقلك المرة تلو الأخرى ...
أن تكون أبو الفتوح شوشة فهذا معناه ألا يرحموا شبيتك وأنت قد قاربت الثمانين ... فيزجوا بك في المعتقلات غير آبهين ... ويحولوك لمحاكمة هزلية غير مستنكرين ...
أن تكون أبو الفتوح شوشة فهذا معناه أن تُحارب في رزقك وسكنك وراحتك وانت شيخ كبير ... ويضيقوا عليك كل شئ حتى يسجنوك ... في الوقت الذي تتمنى أن تنعم فيه براحتك ...
أن تكون أبو الفتوح شوشة فهذا معناه جهاد في صغرك ... تعذيب في شبابك ... بهدلة في كهولتك ...
أن تكون أبو الفتوح شوشة فهذا معناه ... اننا معك حتى النهاية ... نهاية ظلمهم أو نهايتهم ...
الروابط :
مدونة انسى تذيع نبأ اعتقال شيخ المجاهدين
http://ensaa.blogspot.com/2007/04/blog-post_9947.html
مجلّة "فلسطين المسلمة" تذيع فقرات من جهاد شيخ المجاهدين
http://www.fm-m.com/2003/aug2003/story24.htm
تقرير صحيفة المصريون عن اعتقال قدامى رجال الاخوان المسلمين
http://www.almesryoon.com/ShowDetails.asp?NewID=34088&Page=1
ملف pdf عن جهاد شيخ المجاهدين المصريين في فلسطين
http://www.fm-m.com/2003/aug2003/pdf/51.pdf
جاري تدعيم الحملة بتقرير جريدة الدستور عن شيخ المجاهدين بتاريخ 13/5/2007
جاري تدعيم الحملة بتقرير جريدة الوفد عن شيخ المجاهدين بتاريخ14/5/2007
جميلة أجاباتك ولذيذة
تحياتى
انا قريت الاجابات مع اني مش بحب التاجات المرة الي فاتت عديت بسرعة بس لما جيت تاني لقيت نفسي بشوف اجاباتك عجبتني جداا الرحلة دي الي روحتيها
اجباتك تدل علىشخصية تجمع بين الروح المرحة والعقل الراجح ومشاعر مرهفة ربنا يكرمك
كنت هبعتهولك
لقيته عندك
تحياتي يا قمر
إجاباتك لذيذة أوي
رانيا
انتي فين
لا علي النت ولا بترني
فيه ايه؟
انتو كويسين
بخصوص احمد فانا بقولك هقتله
يا هيقتلني حاجه من الاتنين
هو اخوكي صحيح بس بجد هقتله
الحقيه بقي
ابقي طمنيني عليكي
انا برجع متاخر من الشغل يعني بقعد متاخر علي النت
بصي لو هتدخلي اديني رنتين ورا بعض وانا هفهم
متنسيش يا بنتي
انا اسمي مكتوب ؟؟
..
لا
..
طيب
!!!
انا كنت من غير الصحاب صاحب قلق
وكنت عايش ف الحياه ع المفترق
مين اللى قال انك هتقدر تنتفض
من غير ما حد يشد ايدك م الغرق
كراكيب عادل
اه فعلا قلها دى كلها ساعتين وتكون فى مصر
:)
الحمد لله ان الرحله عجبتك
واشكر متابعتك الجميله تحياتى
شريف
اهلا بيك فى مدونتى
يلا اهو عدى على خير
ان شاء الله هعدى على مدونتك
تحياتى ويارب منورنى دايما
اخى الكريم صاحب البوابه
جزاك الله عنه كل خير
واعتزر عن عدم اشتراكى فى الحمله
وكنى معكم بقلبى
دمت بكل خير
bos bos
:)
وانا سعيده انها عجبتك
الف تحيه لكى
قلوب حائرة
الله يكرمك يا ستى
اخجلتم تواضعنا
متشكره على رايك الرقيق
تحياتى
shermen
انتى كده بتحرجينى
عشان انا مبعتهوش ليكى
بس يا ستى دايما سباقه على طول
متشكره جدااا
تحياتى
gohayna
ياجى جى فداكى
بس انا سالته على اللى عمله وقعد يضحك وقلى كنت بغلس ليها
مهو اخويا
يعنى الغلاسه دى شاربها منى
:)
لا متزعليش يا ستى وحقك عليا انا
وهاخد تارك اصبرى
انا تمام الحمد لله والناس هنا بتسلم عليكى
نفين ورضوى طلال وهايدى ويامن ومها
انا حاولت ابعتلك مسدج بس موصلتش
يلا ان شاء اللله هرن عليكى متاخر
قبلاتى
Sharm
احمد تصور انتن الوحيد اللى افتكر المسرحيه دى
:)
شكلك متابع كويس للمرحيات
:)
تحياتى
حقى اهرتل
و ...عجبى
اهلا بيك ويارب منورنى دايما
تحياتى
انا زعلان منك
علا فكرة انت من اوائل المشجعين عندي
لا لا ولا كلمة
انا خلاص زعلت
متحاوليش بقولك
طب خلاص ماشي سماح النوبة دي
هههههههههههههه
تحياتي
احمد طاهر
معلش بجد
على التاخيير
وانا داخله حالا اقرء
يلا سلمات
تم أفتتاح العدد الأول من مجلة نفسنا
نتمنى منكم زيارتنا
لما تحسى انك مش عارفة تكتبى
ابدائى الكتابة ابداى باى حرف
هاتبقى كلمة وبعد كدة بوست كبير
جربى
بس اجبات حلوة بجد
نفسنا
الف مبروك الافتتاح وان شاء الله لكم المتابعه
تحياتى
ELGaZaLy-=-.:.
اهلا بيك فى مدونتى
يا ريت اقدر اعمل كده بس ان شاء الله هحاول
سعدت ان اجاباتى نالت اعجابك
تحياتى ويارب منورنى دايما
إرسال تعليق