كل سنه وانتم طيبين

كل سنه وانتم طيبين

سنه 2007عدت

بكل اللى فيها من افرا ح واحزان ومواقف كتيره فى حيتنا علمتنا وكبرتنا

اجمل ما فيها انى عرفت ناس كتيره منكم اثروا فيا جدا حبتهم جدا من غير ما اشوفهم

عرفت قد ايه هو جميل ان حد يحس بيا ويشاركنى احساسى الى فضفضت بيه من خلال البوستات

اعتقد ان كلنا اثر فينا التدوين واضاف لينا ووسع فكرنا وقلبنا واستيعبنا لناس تانيه مختلفين عنا فى وجهة النظر

ربنا يديم علينا نعمة الكتابه والفضفضه

:)

ودلوقتى احنا فى انتظار 2008

يارب تبقى سنه جميله علينا كلنا نتعلم فيها اكتر ونكتب اكتر

ونحقق فيها ولو حلم من احلامنا

تحياتى لكم جميعا

احداث فى حياتى

تغيبت كثيرا عن التدوين ولربما اكون ادق لفظا اذا قلت نغيبت كثيرا عن الحياه

منذ عام ونصف بدأت حياتى تأخذ منعطف اخر للواقعية منه حظ كبير

واقعية ممزوجة بالتامل الشديد لمعنى الحياه

اصابنى ياس شديد وحزن لم ارى له مثيلا من قبل حاولت ان انزعه من داخلى بشتى الطرق رافضه اياه

ولكنه كان يغلبنى حتى فى كتاباتى الاكثر تفائلا كنت اشعر به يتوغل بين السطور ناظر الى هاتفا

لا تهربى لا تحاولى ان تستنجدى بخيالك لترفضى الواقع

ولكنه والله كان اصعب شىء مررت به ابتلاء شديد هزنى بشده

وجدت نفسى شخص اخر لا اعلمه شخص لم اتوقع خروجه من داخلى ابدا

شخص ضعيف لابعد الحدود

لم اتحمل ان ارى اقرب الاشخاص الى قلبى مريض ضعيف وهن

لم اتصور قط اننى ساراه امامى بهذه الحاله التى كانت تزداد تدهورا عبر تلك الفتره

هو ابى رحمه الله

بعد صراع عنيف مع المرض واقسم انه كان صابرا لابعد الحدود ولم يتالم امامنا خوفا علينا

الى ان توفاه الله منذ بضعة ايام يوم السابع والعشرين من رمضان

ليرحمه من عذابه

وليستقبله فى ايام جميله

اساءلكم الدعاء

تاملات

عندما اشعر بالعجز تجاه شىء ما اردته- ان يكون لى- بشده ينتابنى ضيق رهيب اشعر ان الحياة قد لا تكتمل ان لم انله
تمر بى تلك الفتره التى خلالها تضيق الارض بما رحبت .اعجز عن التركيز؛ اتالم بشده؛ اعلو قمة حزنى ؛توشك قدمى ان تنحدر و.....اذ بطيف يجذبنى للخلف هاتفا فى اذنى ان اتريث قليلا واتامل فى هذا الشىء
تهدى نفسى... اجالس الشىء ....اراه معى؛ وارانى بعدما تملكته

ارى كيف كنت حمقاء عندما فكرت يوما ان الحياة ستنتهى او ستتحول الى شقاء بدونه.

بل ارى ايضا اشياءقد اغفلت عينى عنها .اشياء لا اطيق ان افعلها فى ظل حوزتى عليه
كيف للحياة ان تنتهى لمجرد عجز المرء عن الحصول على ما يريد .بل كيف يتيقن من ان ما يريده سيجلب له السعادة الابديه او حتى الوقتيه
ستظل الحياة تسير بنبضها المتتابع قد تحصل خلالها على ما ترغبه او لا تحصل عليه

بل قد تجلب اشياءا لك لم تردها ولم تفكر فيها ابدا

قد تغيير تلك الاشياء الاخرى حياتك البته
عقولنا اضيق بكثير من ان ترى كل ما هو امامها مهما كان تتابع الاحداث يسير بشكل نمطى نعتقد خلاله سهولة التكهن بما سيحدث

ومهما صارت هناك اضواء تكشف لنا الطريق لنطلع على اخره
فعلى جانبى الطريق تتقاطع طرق اخرى قد تندفع منها اشياءا على حين غره

اشياءا قد تضطرك الى ان تتخلى عن طريقك وتاخذ منعطفا اخر

اللحظة الحاسمه

أستل سيفى

من غمد محبرتى

.

ألعن

لحظة توقف

عن طعن وريقاتى

.

أكتب

كلمات باتت دوما

بين أضرحتى

.

أترك

الحبر ينساب

ليغسّل أهاتى

هل أتى على الانسان حين من الدهر؟

هذه صوره لجنين ضاق به رحم أمه؛ فلفظه على الرصيف

يتملّقه الماره وعلى وجوه بعضهم ابتسامه!! هل سيأتى علينا زمان

نرى فيه منظرا كهذا ؟! ونعتاده؟

فلسفة الوقت

لاأحد منا يختلف أن الوقت -رغم أنه يسير بأيقاع منتظم .. ثوانى؛ فدقائق ؛فساعات- الآ

أنه كثيرا ما اختلف احساسنا به0

على سبيل المثال..قد تتواجد مع شخص ما ؛فى مكان ما

لوقت معين .وليكن ساعه

قد تشعر أن تلك الساعه قد مرت سريعا , والاخر قد يشعر بمدى ثقلها ،ورتابة مرورها0

ايضا على مستوى الشخص الواحد

هناك وحدات زمنيه تمر عليك؛ ويختلف شعورك الزمنى بها0

فاحيانا -رغم ثباتها- يطول أو يقصر احساسك بها0

وهذا ما يدهشنى حقا0

ويدفعنى للتساؤل عن ماهية الوقت

أهو مخلوق؟

هذا يقودنى الى تساؤل اخر

اهو مخلوق روحى؟!ا

يسبقنا تارة،وتارة نسبقه، وأحيانا نسيربمحازاته

فله -كما قلت سابقا -ايقاع ، والايقاع متحرك أحيانا يسرع او يبطء او ينتظم فى حركاته

وعند توقف الايقاع تصير النهايه؟

...

ام هو جماد يسير بفعل قوة ما 0قوة لها طاقه تحافظ على سريانه بشكل دورى منظم وأن اختل مؤشر الطاقه

أختلت سرعته؟

اذا فما هى طبيعة تلك الطاقه؟

أهى شىء ما يكمن داخل كل فرد منا ؛هو المسئول عن تفاوت الاحساس بالوقت ؟

.....

تساؤلات اخرى عديدة أطلق عقلى العنان فيها ولم يتوصل لاجابه محدده

وليكن00سأكتفى بما قمت بعرضه عليكم وعلنى اتوصل لاجابه

هذيان

ارتجل...والليل

قد سكن

بشبح الهذيان

يمرق سريعا

خلف

طيات من ظلام

...

صوت ما قد

بعث الخوف داخلى

من جديد

صوت نداهة

استباحت ..دم

عشيقها الذليل

...

عقلى قد أهذاه

الخوف
و

طول الانتظار

يريد ان يغفو

يتثائب

يبتهل

اشراق النهار

...

الوقت بثقل يمضى

يزيد من خوفى

من الامى

فلا ليل ينجلى

وقبل الصباح-اخشى

ان ينول الشبح

من عظامى

أيهما تعتنق؟

فى ظل هذه الحقبه الزمنية التى قدّر لنا أن نحياها .أوجدت الحياه لنا عقائد

بعضنا من اعتنقها واخرون لازالوا فى ريبة منهاوأخرون ألحدوا بها

تستطيع أن ترى الان _انت يا من تحيا فى وطننا الحبيب_عقيدتين راسختين

التغييب والسوداويه

نعم السوداويه

قد يطلق عليها البعض مسمى اخرالا وهو الواقعيه

ولكن قبل أن أوضح الفارق بين الواقعيه والسوداويه سأتطرق سريعا الى

عقيدة التغييب وهى فى رأى العقيدة الاكثر رواجا

فصاحب هذه العقيده أو_ لتحرى دقة اللفظ_من يعتنقها .يرى فيها سبل السعاده

فهو فى غيب عن كل ما قد يؤرقه _ دعونى أكون أكثر تحديدا_ ليكون

بعيدا عن كل ما يفترض ان يورقه كفرد يحيى فى مجموعه

قد يفهم البعض ان استخدامى لكلمة

يفترض

تشير الى إلحادى بتلك العقيده

ربما

على أية حال .قد اخبركم فى نهاية الامر اية عقيده اعتنق

فى ظل عقيدة التغييب يتبارى الفرد فى التباهى بعدم المعرفه

او اللا مباله بما يحيطه و لايتعلق به بشكل مباشر

وقبل ان انتقل للعقيده الثانيه

على ان اعترف ان ذلك المغيب لا يشترط ان يكون انسان فاشل

بل قد يكون شخص متفوق فى عالمه

فى عمله

فى حياته الخاصه

فى علاقاته

بل قد يكون انسان مؤثر فى المجتمع المحيط _دون ان يدرى او يقصد_اكثر من غيره

من الملحديين

والان جاء دور العقيده السوداويه

لماذا لم اوصفه بالواقعيه

لانه _فى أغلب ظنى_ قد لا يستنير بمعرفة الواقع المحيط بل ان نور تلك المعرفه

وشح عينيه بالسواد

هو شخص علم بالواقع ورأى فيه عيوبه

وتنبأ بالطريق الذى يسير فيه المستقبل

أصابه يأس واحباط

فتوشحت عيناه بالسواد ووقف ينتظر النهايه المحتومه

أى ان السوداويه صارت النتيجه المصاحبه للواقعيه

بل استطيع القول ان السوداويه صارت المسمى الفعلى لهذه العقيده

فقلما أن تجد من يحيا الواقع ويراه حق الرؤيه ويقبل على الحياه

محاولا أن يغيير الواقع دون ان يعتنق التغييب و يرى فيه سبيلا للخلاص

او ان يترك المذهب الاكثر انتشارا فى عقيدة الواقعيه

ذلك المذهب السودوى. الذى فضلت ان اسمى به تلك العقيده

نظرا للكونه اكثر مذاهبها انتشارا

والان اي العقيدتين تعتنق؟

واهى فرجت بتاج

التاج ده بقى جيه فى وقته لانى كنت عايزه اكتب جديد ولسه الوحى منزلش

أشكر اولا الصديقه المدونه شهيده

http://shehidah.blogspot.com/

والصديق المدون يامن

http://human-construction.blogspot.com/

على تمرير هذا التاج لى

وهذه ورقة الأسئله وكمان معاها الاجابات النموزجيه

_________________________________

أحب شخص لقلبك فى الدنيا؟

من اولها كده اسئله صعبه

لو كان شخص بعينه فهذه اجابه صعبه

لانى بحب العديد من الاشخاص وبنفس العمق

____

انسان مستعد تضحي بحياتك –ركز فى كلمة حياتك- عشانه؟

نفس الاشخاص ولو كانت مصر شخص فبصراحه اتمنى أن تكون روحى فداها

بس طبعا لو كانت روحى دى هتعمل فرق يعنى

يعنى أموت أموت ويحيا الوطن

مش اموت أموت ويموت الوطن

العمر مش بعزءه على الفاضى يعنى

____

।انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟

يا ساتر يارب

ده حتى شارون عمرى ما اتمنت اعمل فيه كده

_______

ما هو:اسم أجمل كتاب كتبه بشر قرأته ومحتفظ به حتى الان؟

الرحيق المختوم عن سيرة أشرف الخلق

لصفى الرحمن المبار كفورى

وأنا أستعرته من زميل عزيز

من أيام الدراسه

ومش عارفه أوصله

ليه

فعشان كده هيفضل فى الحفظ والصون ألى أن أراه

وبينى وبينكم انا شكلى كده هضرب عليه وربنا يسمحنى بقى

وكفايه انى بدعيله

ربنا يكرمك يا محمد يا عشرى

:)

___________

اسم كتاب-كتبه بشر برضة- انت متعلق بيه وبتقرأه كل فترة؟

مجموعة روايات لشكسبير ملمومه فى كتاب قديم عندى

___

اهم جهاز منزلى انت متعلق بيه او بتستخدمه كتير؟

ألى بتواصل بيه مع الناس

الكومبيوتر والتليفون

وأحياناالبوتاجاز اصلى بحب اجرب فى الغلابه اللى عندى فى البيت

:)

___

شىء تحس بالراحة النفسية عندما تنظر اليه؟

المناظر الطبيعيه البعيده عن الزحمه وخصوصا فى اوقات الصبح بدرى او ساعة الغروب

الاشجار و المطره الخفيفه و الطيور والحيوانات الصغيره

النيل و البحر وصوته اما يبقى هادى

بس احيانا بفقد القدره على الاحساس باى جمال

___

مكان تحس فيه بالحنين الى شىء لا تدرى ماهو و ذكريات جارفة الى لاشىء؟

نفس المكان اللى فى السؤال السابق

___

مكان تحس بالراحة عندما تدخله؟

البيت اكتر مكان برتاح فيه

______

اجمل مدينة زرتها داخل مصر؟

رغم انى تقريبا لفيت معظم المحافظات لكن اجملها بالنسبالى

القاهره بموت فيها

____

أجمل مكان طبيعي رأيته داخل مصر؟

لا دى حكايه طويله بس هحكيهالكم

لو زههقتم اقلبوا على السؤال اللى بعده

من كم سنه كده

رحت مع بابا واخواتى وكمان شوية ناس اصحبنا

رحله الى

الصحراء الغربيه عند ناس معارف كانوا عاملين مزرعه فى الجبل

ورى المزرعه دى وعلى مسافه منها الهضبه الغربيه

رحنا ومشينا لحد ماوصلناها وكان هناك ممر رملى بيخترق الهضبه

تابعنا المشى فى الممر الضيق المحاط بالصخور العاليه وصلنا لمنطقه مستديره واسعه كلها محاطه بسلسله متصله من صخور الهضبه الشاهقة الارتفاع و شفت اجمل منظر فى حياتى كلها

شجرة نبء مزدهره بالثمار فى وسط الصحرا والصخور

يعنى الشجره تقريبا تتوسط دائره من الصخور نصف قطرها عشرة امتار

والارضيه رمليه

وكلت احلى نبء بعد رحله طويله

وكمان طلعنا فوق الهضبه وشوفت اجمل تانى منظر

كهف جبلى زى بتاع الافلام كده مبطن بصخور لامعه

تشبه البورسلين ملساء ولكنها طبعا مش مستويه

وكمان كان فيه شوية خفافيش

متعلقه وبعد ما طلعنا من الكهف

استمرنا فى التسلق وشفت بقى منظر بديع من فوق الهضبه

الصحرا بقى والمزارع الجبليه

واحلى جزء كمان فى الرحله واحنا نازلين من فوق الهضبه

وعلى فكره هى مش صعبة التسلق ولا حاجه مش محتاجه احبال والكلام بتاع الافلام

المهم خلينا فى احلى جزء ساعت النزول

كان فى طريق رملى واخد من اعلى لاسفل الهضبه

اخويا مسك ايدى ونزلنا جرى وطبعا مقلكمش على الدحرجه والوقوع

وعلى فكره كانت معانا شمسيه واحنا فوق اول ما فردناها عشان الشمس

اخويا كان هيطير. الهوا فوق شديد جدا

واخر الرحله وفى عز الضهر لاقينا ديب

اه والله ديب من اللى بيعضو دول

الراجل اللى كان معانا فى الرحله كان معاه مسدس

ضرب طلقه كده فى الهوا راح الديب الجبان مشى

:)

ياااه اجمل رحله واجمل مناظر شفها فى حياتى

ووالله الكلام كله جد عشان محدش يقول حاجه

انا كمان اختصرت

....

وكمان سلسلة جبال البحر الاحمر

تحفه

_____

شخصية كارتونية بتحبها؟

ميكى ومينى وبطوط والبطابيط ولاده

وكان فيه سنجابين توؤم بيعملوا مقالب وبيسرقوا الاكل

وتوم وجيرى طبعا

_____

نوع هاتفك المحمول؟

احم نوكيا وتقريبا من جيل

الستات

الى مفردها سته يعنى

:)

_____

سرعة بروسيسور جهازك؟

انا لو اعرف هقول على طول

بس هو مرخم اليومين دول

_____

حجم ذاكرة –هارد- جهازك؟

80

____

المساحه التى تشغلها المواد الاسلامية على جهازك؟

مش عارفه والله بس هى مش كتير

_____________

نفس المساحة السالف ذكرها فى قلبك-الاجابة لنفسك عشان الرياء يا اخواننا-؟

لاء ده سؤال صعب

_____

أهم هدف انت واضعه لحياتك دلوئتى؟

هو ده الهدف

انى الاقى اهم هدف

لانى عندى اهداف كتير

_________

مواصفات فتاة –أو فتى للبنات- الأحلام بالنسبة لى البنات؟

:)

عريض المنكبين مفتول العضلات شنكول الحركات شلولح

:)

أهو ضل راجل ولا ضل حيطه

لا بجد المواصفات والكلام ده بيتغير مع حاجات كتيير بتتغير جوايا

لكن بردو فى شوية ثوابت أرجو انها متتغيرش ومضطرش اتنازل عنها

______

___

صف ما يأتى:شعورك لما بتسمع كلمة مصر؟

اليومين دول

بحس انى عاوزه اعيط

واخدها فى حضنى

____

شعورك لما بتسمع كلام عن اليهود؟

على حسب

اللى بسمعه

______

شعورك لما بتشوف ظابط شرطة؟

بردو على حسب الموقف اللى بشوفه فيه

________

شعورك لما بتشوف الكناس العجوز فى الطريق؟

يعنى فى راى انها مهنه زى كل المهن

بس بتغاظ اوى من اللى بيستخدموا المهنه دى للتسول

وخصوصا اللى بيقولوا

كل سنه وانتى طيبه فى كل الاوقات

بس دلوقتى بغيير منهم لانى عرفت انهم بيقبضوا اكتر منى كطبيبة اسنان فى فترة التكليف

:(

وبالنسبه لوصفه بالعجوز

فالعمل لو كان قادر عليه فوالله ده افضل من انه يتسول

طالما صحته مساعداه وبدعيله ربنا يديله الصحه وميحتجش لحد

اما اللى مش قادر فعلا وبيشتغل فده

بصراحه زى ما اعيب على الحكومه بعيب على الناس المقتدره

مفروض يبقى فيه تراحم بينا

_______

لون البطانية اللى بتتغطى بيها فى الشتاء؟

سؤال مضحك

:)

يعنى اى واحده اهم حاجه انى استخبى تحتها مش من البرد

وبس لاء وكمان من الخوف اصلى معرفش ليه ببقى مرعوبه فى الشتا وكل الافلام الرعب بفتكرها

:)

_____

لون الجورب-الشراب- المفضل لديك؟

الغوامق عشان متتبهدلش بسرعه

____

احساسك اذا داست قدمك فى الطريق على مخلفات اخراج حيوان- *** ولا مؤاخذة-؟

بصراحه ببقى عاوزه احرق نفسى

وبطنى بتوجعنى

ايه بس الاسئله دى

________

_افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟

لو ركزت فى وشه وحاسيت براحه

ببقى مبسوطه وبدعيله بالهدايه

_____

احساس يراودك فى اشارة مرور مغلقة بسبب مسئول كبير؟

ببقى متعصبه جدا وبحسبن

______

التاج ده أمرره

لدوى الصمت

وابو ضحى

وابن مرّ

وياسمين

وطهقانه

والورده السوداء خاصة

وكل من يريد

والامتناع مصرّح بيه والزعل مرفوع

تحياتى للجميع

بعض الارهاصات من دفاترى القديمه

استغاثة الفرسان

تراقصت اضواء الشموع فوق صفحات الورق

راسمة ملحمة عصريه تحمل معنى الأرق

اشباح هم فرسانها يقاومون بحر الغرق

يقاومون ظلا محيطا قادما من كل مفترق

يستنجدون بأنوار بعيده انها أنوار الفلق

لكن السحب قد خيمت مانعة حتى الغسق

يستنجدون بعود ثقاب ليشعل شمعا أحترق

لكن سيف العواصف انطلق وقد رشق

بعثر الورق كل جهة وكل فارس أفترق

حاولت جمعه فوجدت الورق قد أحترق

علّها تعيدنى لنستمر

لايجدى احيانا لهذا....أثرت السكون

ان أقترب منها و أسكن اليها

وأعود لها كى تعيدنى

لهذا أبتعدت.. لأكون معها ...بمفردنا

أجد فيها عزائى عما أراه وأعيشه

وأرفضه

ألجأ لها أرتمى فيها

أبقى معها طويلا نتباحث عما أريده

وعما يجول بى وعما أنويه. أحيانا

تمقتنى وتعنف أفعالى...وأخرى

تخشى أن أشرد منها

فتوافقنى

أظل هناك طويلا000أغتسل بصدق دمعها

أتبرأ بحسرتها من خطاياى

أمسح بندمها الشجىّ أثار شجنى

تنهض

تجفف بسعة قلبها

ما أدماه قلبى الجريح

انهض معها

نلملم ما بقى من رفاتى

وتدفعنى لأن

نستمر00من جديد

ارتقاء

عندما تجهض الافكار فى رحم العقل والاحساس

ويعجزالقلم عن

الخروج بذالك الجنين مكتملا

فيولد مجرد مضغه على ا لصفحات

. اطويها

والحسرة تدمى قلبى

يموت جنينى قبل ان يكتمل نموه

......

يواتينى هذا الشعوردوما عندما أتوقف عن الكتابه او عندما

تأبى أفكارى أن تكتمل

ولكن هناك أشياء تسطع لك فتداعب مشاعرك وترتقى بروحك

فتجد القلم يابى ان يتركها تمر مرور الكرام

...

الان وأنا اتامل هذه اللوحة

وجدت روحى ترتقى لهذا المكان

اجد نفسى هناك

أحيا

بعيدا عن كل هموم الدنيا وبعيدا عن كل القيود

عن رتابة الاستيقاظ على أجراس المنبه

عن الروتين اليومى

بدءا من الغدوّ الى العمل

مرورا بالازدحام

والفلول منه

بلا تفكير مضنى فى حال البلد

فى حال الوطن

فى حال الامه

بلا هذه التساؤلات التى تضنى عقلى وتذهب بهجة قلبى

لماذا الحزن فى أنفسنا صبىّ

والسعادة كهول؟

لماذا أخشى المرض وأخشى فراق الاحبه

رغم انه سيأتى اليوم الذى أفارق فيه؟

...

هناك حيث اللا أحقاد واللا ضغائن

بين بنى البشر

حيث

اللا خوف

..

وحدى

احتضن الطبيعه وافترش ورودها

اركض

حينما أبغى الركض

افلت شعرى ليداعبه الهواء

اتمدد على العشب بعد الارهاق

ابسط يديّى

اتامل صفو السماء

.

وحدى

بعيدا عن العيون البشريه

لا احد يتدخل فى شئونى

لا احد يلومنى على جنونى

.

يقشعر جسدى باستنشاق نفحات النسيم

يرتعش قلبى مع اطلالة شمس الصباح

بدفئها الذى يتخلل روحى

.

اسبح فى هذا النهر

ألقى كل همومى على صفحاته

اتركه لياخذها فى أعماقه

يطهرها .فيطهرنى

....

أنعم بصوت الطبيعه

يطربنى نبضها

تنساب روحى فى شراينها

الى ان

أصبح جزءا منها

_________________

رغم أن القلم بات رافضا الا ان يعبر بخواطره عما اوحت اليه هذه اللوحه

ولكنه عجز ان يقدّرها حق قدرها

فهى فى نفسى تحمل اكثر مما تجرّء حبره على وصفها

ما أجمل ان ترتقى روحك الى مكان ينعشها ويعيدها اليك صافيه

مقبله على الحياه

ارتقاء وعوده

بلا هروب

عمر......و...عمر

كنت فى مدونة صناعة الانسان

http://human-construction.blogspot.com/

لصديقى المدون يامن نوح وقراءت له هذا البيت

عمرى ينساب
كشربة ماء ...فى كف
يدى ... يومى كغدى

فأوحى الببت لى بكتابة النص التالى

_______________________________________
عمر...و...عمر

عمره ينساب
كشربة ماء...فى كف يده
يومه كغده

للغد شمس مسحورة
يخرجها الحاوى
من جعبته

تشرق وضاءة لمن
يبغيها.. وتشحب
لمن يفلتها من يده

....
يومه كغده.. وغدى
يوم اخر
لا تزّينه الزهور بل
هو طريق طويل
وعرّ


اشق كل صخرة فيه
تعيقنى ...اعلوها
تياس منى

تنتحر

......
عمره ينساب
كشربة ماء.. فى كف
يده
يومه كغده

وعمرى يزدان
كل لحظة.. حتى غدى
فقلبى ملكى
ملك يدى

اغرّت به المكاره
فصاغها

حبا
وداوى..علّته
علّتى

انا لا اتجمل ولكنى أكذب

بشرى لكل مواطن مصرى الان لك الحق التصويت او الصويت
شعار جديد ولك حق الاختيار
(انا لا اتجمل ولكنى أكذب )
هل انت ممن يشجع دسترته كماده اساسيه تضاف الى مواد الدستور؟
ام انت ممن يشجع اضافته كوجه اخر لكل المواد ؟
اتصل الان للادلاء بصوتك الكريم

الاختيار اجبارى

الاغلب على علم بما يتم الان من تغيير بعض المواد الدستوريه لا اخفيكم سّرا انى لم القى بالا- بالقدر الكافى- لمن يتحدث فى هذا الشأن
ليس كنوع من انواع اللامبالاه ولكن احيانا يصيبنى الفتور من متابعة شىء اعلم انه سيتم رغم انفى وانوف الجميع ولكن اثناء متابعتى لاحد البرامج. كان فى ضمن ما يعرضه.. الحديث عن تغيير الماده
الثامنه والثمانون
ادهشنى حقا ما يودون فعله
بمقتضى التغيير سيتم اقصاء القضاه عن الاشراف على الانتخابات وسيتولى الاشراف مجموعه من الموظفين
يعنى التزوير هيبقى عينى عينك
الحكايه بدأت بالتجمّل وبعده اتضح الكذب
ببساطه
الشعب يحصل على حقه فى انتخاب رئيسه وذلك بعد تعديل الماده

76

88 ومن ثم تتضح الكذبه بتعديل الماده

والادهى والامّر تعديل الماده

179

والتى بموجب تعديلها لا تستبعد ان تفتح دولابك تلاقى واحد بيسحبك ويقلك قدامى

والواحد ده يطلع غفير او حتى عسكرى نفر شكلك مكنش مريحه وانت خارج من بيتك

الصبح

ولا تستبعد أيضا انهم يسحبوك وانت ماشى لوحدك فى الشارع بتهمة التّجمهر

والحق يقال

هذه التعديلات ستيسر لنا ان نصبح اكثر تدّينا

فلانتدخل فى شئون الغير... وكن على اقتناع تام انك انت.. الغير

وغضّ البصر.. فلا تنظر ألى ما حرّم الله. فنظرتك ألى اعمالهم تعّد سهم من سهام ابليس

ولتحقيق أكبر قدر من التقوى

الاولى أيضا عليك

...

أتذكر الان بنوكيو

اتتذكرونه؟من افلام الرسوم المتحركه

عندما يكذب بنوكيو يزداد انفه طولا

فيلم ينفّر الصغار من الكذب

اتعتقد انهم يحتاجون مشاهدته الان ام انه للصغار فقط؟

وفى اعتقادى الشخصى انهم يسعون لتطويل انوفهم

لتسهيل دسّها فى أقل ما نتمتع به من شقوق فى ذلك السد الذى يحول بيننا وبين حريتنا

رغبة فى رأب كل شق حتى لا يتصدع

السد ويتجلى لنا ضوء الحريه

...

الهذه الدرجه يوقنون بسذاجتنا؟

لا أعلم حقا الى متى سنظل مكتوفى الايدى

بعد ان صار للكذب شفافيه منقطعة النظير؟

بالله عليكم ماذا ننتظر؟

اناشد كل من يصمت ويترقب الفرج

ان يحضّر كفن ادميته فسيتم اغتيالها عما قريب

من غير فكره

جربت قبل كده تسيب القلم يكتب من غير فكره معينه؟ وانا بكتب دلوقتى كانت دى فكرتى
!
يعنى برضو فكره؟

جايز.............المهم
عندما تتواجد فى مكان ما اعلم انك ثلاثه فى واحد
!
هذا ليس اعلان لمستحضر تجميل ... بل مقوله اجنبيه لمايكل دى ساينتامو...
لا اتذكرها حرفيا.. ساكتبها بطريقتى
احنا اتفقنا انى بكتب من غير اى فكره او شروط يعنى ليا حرية التعبير وبالشكل اللى انا عايزاها مش اللى انتم عايزينوا او متوقعينوا
..
عندما تتواجد فى مكان ما اعلم انك ثلاثة اشخاص
الشخصيه الاولى...هى التى تريد ان تظهرها للاخرين
الثانيه.. رؤية الناس لك
الثالثه... شخصيتك الحقيقيه لا ماتريد اظهاره ولا مايراه الناس
ببساطه الثالثه هى
انت كما يجب ان تكون
السؤال
هل يمكن ادماج الثلاثه ولو لفتره صغيره؟
اعتقد ممكن ادماج رقم واحد وثلاثه
لفتره معينه مش على طول يعنى
اتعبوا شويه واقروهم تانى انا مش هعيد الكلام
ها ايه رايكم؟ممكن؟
رقم اتنين...يصعب جمعها.... ببساطه لصعوبة معرفة ما بداخل الغير فللغير ايضا ثلاثة اشخاص
من خواص الكتابه بدون فكره معينه هى توقع الدخول المفاجىء لشىء اخر غير مرتبط بالسابق
او قد يكون

.....

اه ..للتعذيب لا اعلم لماذا يكتب الجميع لااااا للتعذيب رغم ان المعذب نفسه غير متفق معكم فقوله دوما
ااااااه
اختر اه يقصد بها
(الموافقه_التأوه_اجابه اخرى )
......
النظام والتغير :كلماتان خفيفتان على اللسان ثقيلتان على منطقة ما بين الظهر والراس
وذللك بالنسبه لصاحب نفس اللسان الذى يردد الكلمتين
ومن هنا ياتى السؤال الدينى . هل يعظم ثواب الذ ّكر سرا عن ثوابه جهرا؟
.........

حينما قررت ان اكون شجاعه ماذا فعلت؟
كنا على خلاف دائم فى المنزل -فى بعض النقاط بالطبع وليس الخلاف المطلق -..كنا تشير الىّ وامى
مثلا هى تكره ان اتناول طعامى على مراحل
اما انا احب ان اتناول ......على سبيل المثال لا الحصر

قطعة الدجاج المخلى -البانيه يعنى- اولا ثم بعد فترة اكمل الطعام الثانوى مكرونه بقى او بطاطس
ارجع من بره وادخل المطبخ و اكل من وراها البانيه وادخل انام بسرعه -
لو بقى دخلت صدفه بضطر اكل كل حاجه- اذا

اين الشجاعه؟
....

كنت فى مجلس يتحدث عن مدى خوف العرب من الكيانات الاخرى المحيطه وعجزهم المواجهه .
وكالعاده اخرج من هذه المجالس وقلبى منفطر وحانق
الخوف اكره
لماذا يخاف الناس ؟سؤال رددته كثيرا
الى متى؟ واعاد علىّ مقاله قرأتها بعنوان دور المثقف وكانت تتضمن حديث عن الخوف والقلق والفرق بينهما استعان الكاتب براى الفيلسوف الالمانى هيدجر وجاء فيما اتذكره منها -لا اذكر الكلام حرفيا- وليكن

الخوف :شعور عندما يسرى داخل الانسان يعيقه ويحول بينه وبين التفكير ومن ثمّ التطوير

القلق:شعور يساعد الانسان على التفكير والبحث عما يقلقه ومن ثمّ يحاول معالجته ومن هنا ياتى التطوير

وفى راى ان ليس كل تفكير يؤدى الى تطوير- و قد يؤدى احيانا لنتيجه عكسيه- ولكن ان تحث عقللك على التفكير افضل كثيرا من تركه راكدا

و...علّ وعسى

عدت الى المنزل وعقلى يراجع الاحاديث والتعليقات
....ذهبت لتناول طعامى وجدت
عارفه انكم متوقعين
نعم هو الدجاج المخلى.. البانيه
وامى مازالت مستيقظه ... تذكرت موضوع الجلسه . وبمنتهى الشجاعه
وضعت قطعة البانيه فى طبق
.-يعنى كمان مواعين زياده كان ممكن اخدها بالشوكه او حتى بايدى وخلاص-

وخرجت وقعدت قدام ماما وبدات فى الاكل وفى عيني تصميم رهيب
والمفجاه ! انها لم تعلق
. حسيت بفخر.انا صاحبة القرار فيما يخصنى

.هى دى الشجاعه ..تناول البانيه بدون مكرونه وقدام الكل....يااااه شعور جميل ارجو ممن يعانون نفس المشكله تطبيق هذه الطريقة واخبارى بالنتائج

احيانا الكتابه اللا فكريه- اقصد من غير لعب على فكره معينه- تقود الى اهم حاجات بتشغلك سواء انت عارفها او حتى مش واخد باللك منها
جرب وشوف

...

والان هل مملت المتابعه؟ لك حرية التوقف ولى حرية الاستمرار

وسافعل

.......
ياليلى ياعين ...لااا مش الاغنيه ده البرنامج وكمان ستار اكاديمى
لا تستهوينى تللك البرامج ولكن ..لى صديقه حبيبه دائمة المتابعه لهذين البرنامجين وخاصه ستار اكاديمى وكثيرا ما حدثتنى عن الاشخاص والاحداث
و استنكارها لعدم مشاهدتى اثار فضولى وفعلا
فتحت التلفزيون ودورت لحد ما الحمد لله لقيت القناه
وعلى راى ممثل مش فكره هو مين
يا حلااااااااااااااااااااااااااوه
ايه الجمال ده ..؟ ماشاءالله ماشاء الله احنا اتطورنا اوى ..
جميله المشاعر اللى بين الاخوه والاخوات الافاضل حاجه تفرح
ايه كمية المتابعه الفظيعه دى وده بيبان طبعا من الرسايل اللى بتظهر على الشاشه
عود احمد لبنان الحبيبه
ومش عارفه ليه الغرب مضايق من حزب الله؟

...........

لماذا لا اكتب عن الرومانسيه والمشاعر ؟سؤال طرحته علىّ احدى صديقاتى وكانت تقصد المشاعر بالنسبه للاخر.

- لان للرومانسيه والمشاعروجوه عديده -

استوقفنى السؤال وها هو الان يعاودنى فى تلك اللحظه التى اطلقت لقلمى فيها العنان

عفوا سافكر قبل ان اكتب

وهذا لايعنى انى لم افكر فيما سبق كتابته فالتفكير يختلف عن الفكره

الفكره قد تاتى وليدة اللحظه واجد اسهاب فى التعبير عنها لكن احيانا تاتى الفكره وتحتاج لوقت للتفكير فيها قبل التعبير عنها-

الاجابه:انا بالفعل كنت اكتب تللك النوعيه من الكتابه ولكنى الان توقفت.احيانا كنت احاول

الرجوع لكن قلمى يرفض ربما لاننى منذ فتره قررت الا اكتب عن شىء دون ان اشعر به-هذا

النوع من الكتابه يصل سريعا للمتلقى- وربما لانشغالى بقضية اخرى

وربنا يفرجها

وهذه الدعوه لاتتضمن فقط ان اجد الاخر ولكنها ايضا تتضمن العوده الى نفسى ليس مشروط ان

كل من يكتب عن الاخر بالفعل قد وجده ككيان مادّي فقد يكون الاخر هو ذالك الطيف الجميل الذى يلهمك

ولكن حتى هذا الطيف تلاشى من حياتى

لكم اوّد العودة الى نفسى بكل جوانبها فالحياة لاتقتصر على شىء واحد

الان ملّت اناملى الكتابه ولم تتوقف الافكار ولكنى.. ساسبح فيها وحدى دون ان تشاركونى اياها

فهى ملكى

مسافره

مسافره
اوشك الرحيل الى ارض ليست ارضى
ووجوه غريبه
ادفع غيابات الكون بشراعى وشىء ما فى صدرى
يعترينى..
اقاوم تللك السرمديه. اقاوم الريح
والخوف يلاحقنى انظر للخلف
! لا اجده
انظر امامى ...يقشعر جسدى

ادفع الفحم فى فم الموقد
تزأر النيران.. ويختلط الدخان بالضباب
!!ترتسم وجوه
اقترب منها....اكاد المسها... تتلاشى

اسمع اصواتا ارهف سمعى.
!لا اميز

...

يتعارك الشراع مع الرياح.. تارة يصمد وتارة يتردى
يلقى الى بحباله عل اساعده. اقاومها معه
! لكنها هناك
تضحك بسخريه.. تضحك بوحشيه
تقترب.
يعاود الشراع.. ليلطمنى بحباله

انظر اليه . امد يدا

....!اكاد المسها لكن
تنطفىء النيران .يزداد السقيع. يلتف الضباب
تعدو الامواج نحوى. تؤازر بعضها
تعلو..
على ان ارحل فى مناكبها
لكنى.
مسافره
وطريقى ليس نفس الطريق
تصفعنى موجه .تدمع عيناى
تصفعنى اخرى واخريات
تنهار دموعى مختلطة بالامواج لتغمر وجهى

لكن..طريقى
ليس نفس الطريق
........

يرمقنى الشراع وقد اجهدته الرياح .تتخادل حباله
تبتعد عنى لتواتى الريح
..هناك

هناك صوت
يصرخ
ويضعف شيئا فشيئا
ولكنه يعود ليصرخ
..فى قوة
نظرت فى اتجاهه .فى اتجاه طريقى المنشود

القمر

!!!!
خيوط الضباب تلتف حول عنقه
!!لكنه يقاوم
ينظر الى يبتسم ويقاوم

!!!
داعب شىء ما قدمى

التفت اليه

تركت القمر

يقاوم

مرقت عيناى تهاويم طريقى

ابتسمت

وسالحق بهدا الشىء

نعم

سالحق بالحبل

تفاؤل

جلست معها

نبحث عن جديد

فقد مللنا

كل شىء

حتى الملل

اعادت لى خاطرة كتبت فيها

ما فائدة الحياه

دون امل

شاعرة .......انا

شاعرة......انا

........

تتوالى كلماتى عبر السطور

لتعبر عن شخص مغمور

ذاك الشخص الذى

.انا فيه

وعن عيون الناس

.اخفيه

...........

شاعرة انا..

.اتنقل بين الحروف

وابجديات الكلام

على اصل لمعنى

يضىء

مابى من ظلام

.........

شاعرة انا

نفس القلم

قلمى

نفس الكيان

كيانى

لكن.....السطور

تتغير

تجمع

تشتت
تحير

........شاعرة

والشعرشموخ

وكسر للكبرياء

واااه..من كلمة

تظهر

ما بالنفس من رياء

......

.

الشعرعقاب وتصالح

مع النفس

ورب قسوة داوت

ما طواه الامس

....

.الشعر وطن عربى

تاءه بين الحقيقه

والسراب

كلما انتميت لدرب

اجدنى..غريبة بين

الاغراب

...

شاعرة..انا

يقتلنى قلمى ويحينى

اموت

حين تصحر الافكار

وذبول المعانى

واحيا

والكون ورقةارسم فيها

افراحى واحزانى

.....

شاعرة انا

وقلمى

قد توقف هنا

لا اعلم هل يعود

ام سيؤثره

الجمود

لو بطلنا نحلم..

بحب اوى الاغنيه دى
دايما اغنيها او اسمعها اول ما احس باحباط
لو بطلنا نحلم نموت
لو عاندنا نقدر نفوت
........
حبة صبر حبة حماس
تلقى الحلم صوره وصوت

....
تعرفوا يا جماعه
من فتره كنت قاعده اسال نفسى
هى البلد دى فى منها رجى انها تتغير؟ احيانا كنت بقول لنفسى ...ممكن ,وكان السؤال التانى
طيب انا هقدر اعمل حاجه ؟ هقدر اشارك؟ ولا مجرد
لو بطلت احلم
اموت
يعنى مجرد انى احلم ,هل ده كفايه؟
يعنى اسئله عدت عليا قبل كده تروح وتيجى
من كام يوم
اتصل بيا صديق عزيز وقالى
انا عايزك فى شغل ,افتكرت انه حاجه تبع مهنتى ,لكن كمل كلامه وقاللى ان فى يوم الاربعاء فى اجتماع لحزب الوسط
قلت من غير ما فكر ماشى مع انى ملياش فى الاحزاب ولا حاجه يمكن وفقت لثقتى بهذا الصديق وقلت لنفسى اما اشوف
رحت فعلا قابلت ناس الاغلب شباب من سننا
بنات وولاد
الكل بيتكلم بحماس .الكل بيفكر وبيحلم بصوت عالى . الكل حاسس انه لازم يشارك فى حاجه تحقق احلام كتير مننا
دى اول مره احضر الاجتماع .
وكانوا بيتناقشوا عن ازاى نوصل للناس ونخليهم يشتركوا معانا
خلص الاجتماع .روحت وفى نفس اليوم قريت شويه عن الحزب

وكان راى
فعلا افكار جميله منطقيه يمكن اما تقروها تقولوا
يااه مووووت يا...... عقبال ما تتحقق
لكن يا جماعه التغير مش بيجى من يوم وليله
محتاج صبر وايمان الموضوع لهو خطير ولا فى معارضه ولا ثوره
بس هو محتاج ناس تؤمن بيه
ناس تسيبها من نبرة التواكل وتبدء تاخد خطوه عمليه
فى حياتها
عاوزين نفوق بقى ونعمل حاجه تحتسب عند ربنا
انا مش هطول عليكم اكتر من كده
بجد يا ريت تزوروا الموقع اللى على هامش مدونتى
حزب الوسط

مش هتخسروا حاجه

ويمكن تكسبوا اهم حاجه

عارفنها؟

31\1\2007ياريت تحضروا الاجتماع وهو ان شاء الله تعالى يوم الاربعاء القادم

,الساعه السادسه مساءا.51 شارع القصر العينى

المركز الدولى للدراسات امام مستشفى الامراض الباطنه .

العماره فيها محلات طبيه المركز فى الدور الاول

الموضوع مفهوش اى حاجه غير قانونيه

وربنا يوفقنا للى فى الخير

حبيس الخوف

نزين بالاغلال اعناقنا

تنكس الرؤس

تمحو العقول

تدك اقدامنا

فى الارض

نعجز عن الحركه

نتستر بالهجاء

ونكتفى بدعاء

دون رد

*****

دعاءنا

يشوبه الخوف

فندعوا بالسلام

خشية الحرب

ندعوا

بضروب الامان

وكم من حرب

كانت

للسلم درب

********

صار الخوف

ضميرا مستترا

تقديره الحكمه

الخوف هو الفاعل

الخوف هو القاتل

بل

هو النقمه

*******

لعنة نصب اعيننا

ننظرها

ببلاده

تطبق علينا الرحى

تكتف ايدبنا

بقلاده

*****

توصم جباهنا

بوصمة

العار

لتخبر اطفالنا

هؤلاء هم

الانصار

(انصار الخزى والعار)

****

تركوا ....

راية الشرف

راية الجهاد

خشية عدو

ينشر فى

الارض الفساد

****

تركوا....

امصارهم

اوطانهم

اعراضهم

تحت رحمة عدو

لا يرحم



خوفا على.

ارواحهم

اموالهم

زيناتهم

وسبيل الله

هو

الاعظم



*******

فيا امة الابطال

كفاكم البحث

عن

بطل

يدق الدفوف

يوحد الصفوف

هذا

بط؛ل

****

انزعوا اللعنه

التى

اصابتكم

انزعواالخوف

ذاك

مصيبتكم

*****

فالبطل يكمن

فى انفسنا

لكنه....

حبيس الخوف

على هامش الحياه

• كنت دوما انظر اليهم
  

• 
  
  ...هؤلاء
  من هم على هامش الحياه ...... ويرق قلبى لحالهم
  هم اناس ليس لهم فى الحياه طريق
  فتجنبوها..... واتخذوا من الهوامش طريق
  اه... كم يعذبنى ان اراهم هكذا
  انا امضى سريعا ... وهم يزحفون
  انا احلم...وهم مستسلمون
  انا ارى وهم .....تائهون
  توقفت ...لانظر بجوارى
  وجدت اخرين
  اسرع منى
  ابصر منى
  تجاوزوا الاحلام
  فوجدت .....
  انى
  ايضا
  على هامش الحياه