لايجدى احيانا لهذا....أثرت السكونان أقترب منها و أسكن اليها
وأعود لها كى تعيدنى
لهذا أبتعدت.. لأكون معها ...بمفردنا
أجد فيها عزائى عما أراه وأعيشه
وأرفضه
ألجأ لها أرتمى فيها
أبقى معها طويلا نتباحث عما أريده
وعما يجول بى وعما أنويه. أحيانا
تمقتنى وتعنف أفعالى...وأخرى
تخشى أن أشرد منها
فتوافقنى
أظل هناك طويلا000أغتسل بصدق دمعها
أتبرأ بحسرتها من خطاياى
أمسح بندمها الشجىّ أثار شجنى
تنهض
تجفف بسعة قلبها
ما أدماه قلبى الجريح
انهض معها
نلملم ما بقى من رفاتى
وتدفعنى لأن
نستمر00من جديد
هناك ٦٧ تعليقًا:
مين هي؟
هل هي نفسك؟روحك؟ انتي؟
كم هي جميلة
اوروفوار
رانيا
أن تعقدى صداقة دائمة مع
نفسك ..صداقة يسودها السلام و الحب و الطمأنينة.يعنى أن جدى بجانبك دائما من يشدد من أذرك و يقوى من عزيمتك و يقف بجانبك وقت الشدة
هى أوفى صديق، و أحيانا هى صديق سوء..فالنفس أمارة بالسوء..فهى صديق يحتاج ترويض و تقويم
لكن كل ذلك لا ينفى أنها أعز صديق
تمتكين سلاما داخليا مع نفسك..أحسدك عليه
بالنسبة لى فغالبا لا أرى نفسى.ابتعدنا عن بعض فى الأوقات الأخيرة..ربما تكون غاضبة منى الان، و لكنها تعذرنى و تدرك حجم المعاناة اليومية
-----------------------
كنت أتمنى أن أكون أول تعليق لكن معلش غيرها فى غيرها ..على الأقل ادينى اخدت المركز التانى
--------
تحياتى و الى مزيد من الابداع
طهقانه
قد تكون
هى روحى او نفسى او انا
او كل شىء استطيع انا اكون صادقه امامه
ويستطيع ان يحمل عنى ويوجهنى الى ما صح من فعل وما سلك من طريق
اشكر اطراءك
منورانى
أبو ضحى
العزيز
احيانا هى اوفى صديق واحيانا هى صديق السوء
اصبت والله
تحليلك جميل لخص اللى كتابته كله
الحمد لله احيانا كتيره ببقى فى سلام مع نفسى
لانى بقعد معاها كتيير
احيانا بتوبخنى واحيانا بترضى عنى
قد تكون لاترى نفسك لانشغالك كما تقول ومعاناتك
انا ايضا ابتعد عنها عندما انشغل
لكن اما ارجع بيبقى الحساب عسيير لانه بيبقى حساب طويل مش اول باول
الحق اقعد معاها شويه قبل ما يثقل عليك الحساب
لانك ساعتها هتتعب جدا
ربنا يخفف عنك
...
متابعتك وتشجيعك بيسعدونى سواء مركز اول او تانى او حتى الاخير
ادام الله مرورك
ما أجمل ان نكون لأنفسنا اصدقاء
ما أجمل ان نتوحد مع ارواحنا الحائرة
لا أحمد يستحق صداقتنا كما انفسنا
انتى الوحيدة اللى فاهمة نفسك وبتفكروا زى بعض وبتتصرفوا بنفس الطريقة وبتحبوا نفس الحاجات
تحية على البوست الحلو
عزيزتي رانيا
كم جميلا ان نتصالح مع انفسنا وان نتخذ منها دائما ونيس ورفيق ....
وان تكون هي بمثابة الملاذ الهادئ الذي يجعلنا نهرب قليلا من زحام الحياة فهي اصدق من تصدقننا واقرب الينا من غيرها ...
تحياتي ليكي دايما
ودياما متميزة في طريقة تعبيرك الذي يمتلئ بالعزوبة والرقة
تحياتي الخالصة
ياسمي
اميرة المدونين والمدونات
فعلا اكتر حد يفهم الواحد هو نفسه
بس ده بيكون بشرط انه يكون على وفاق معاها
ويكون قادر يطوعها
دائما ما تسعدنى زيارتك
تحيه كبيره ليكى ولذوقك
Ahmed taher
وان تكون هي بمثابة الملاذ الهادئ الذي يجعلنا نهرب قليلا من زحام الحياة فهي اصدق من تصدقننا واقرب الينا من غيرها
اعجبنى تعبيرك هذا
أسعد بزيارتك ومتابعتك
ورقة كلامك
تحياتى أحمد
نهارك مش طالعله شموسه يا رانيا
انتي صاحبتي حد غيري
هو انا خلاص علشان ماشيه تقومي تبعيني بسرعه كدا
طيب استني لما امشي
دي كلها جمعتين
انا بهزر يا بنتي وانتي عارفه
اولا انا قريت البوست تلات مرات
انتي عارفه مش بفهم من اول مره
هههههههههههه
وانا مع ابو ضحي
فعلا رأيه مظبوط
فعلا
النفس ممكن تبقي اكبر صديق للواحد لو فيه عمليه تصالح وتفاهم
وممكن تبقي اقوي عدوا
وساعتاها للاسف عمر الحرب ما تجيب معاها نتيجه علشان دايما بتنتصر
مواضيعك جديده يا ريري
حلو الاسم دا؟
وبجد عجبني اوي راي ابو ضحي
اشوفك علي خير
اوعي تنسي
تحياتي
أنا قريت البوست مرتين لتحديد من تتكلمين عنها و أعتقد أنك تقصدين نفسك أو روحك
اللي أنا حسيته من البوست أنكي تتطلبين ألا تغرقي أنتي ونفسك في دوامه مشاكل الحياه و تريدها أن تعينكي علي تحمل الصعاب و تعضدك وقت الشده
صح؟
تحياتي لكي يا رانيا
اعود مرة اخرى واتفق مع الاخ ابو ضحي في ان النفس بها الجانب السئ او الجانب الذي يجب علينا تجنبة وهو جانب الشر والسوء ... وبالفعل يجب علينا ترويضه ولن يكون ابدا الا بشئ واحد لا يوجد غيره
الايمان يا عزيزتي ..والقرب من الله
هو خير من يؤمن لنا نفسا صافيه تكون هي السكن الذي يأوبنا لو تفرق عنا الاحباب ...
تحياتي لك بشدة هنا وهناك
جيهان
أعز الصديقات
مهو مش كل شويه تفكرينى انك مسافره انتى عارفه ان الموضوع ده بيضايقنى والله
وبعدين انتى اساسا خاينه وبتكتبى من غير متقوليلى وببقى التاسعه او اكتر
كده خالصين
:)
انتى عارفه انك حتى لو معلقتيش
كفايه نورك عليا
انا بحس بيكى اما تدخلى من غير تعليق
وانا متفقه معاكم انتى وابو ضحى
وان شاء الله اشوفك على خير قريب قبل ...
:(
:(
ومش هنسى
سلام يا حبيبتى
micheal
الى بينورنى دايما
انا فعلا بتكلم عن نفسى
وانا كنت اقصد
انه فى ظل الرتم السريع للحياه قد تصبح شخصا اخر شخص غريب عنك
ففى داخلك احد غيرك
فاحببت ان اخلو بنفسى
لتحاسبنى ولنرى سويا اية الطرق التى اسلك
وهل انا على صواب ام اخطات فاذا راتنى انى اخطات تانبنى احيانا بشده واحيانا بلين حتى لا أنفر منها وكل حسب الخطا
ومن بعد ندمنا ودموعنا
تحاول ان تلملمنى لتعيدنى واياها سويا لنستمر فى الحياه
بدلا من ان اتركها واسير غريبة عنها
هذا ما قصدت
الدوامه هى ان تبتعد عن نفسك
والدوامة الكبرى
ان تبتعد انت وهى عن الطريق الصحيح
اعلم حيناها
انك ستذهب دون رجوع
ستضل الطريق بشكل نهائى
ما زلت نفسى ترشدنى
فان ضللت هى معى
الله وحده أعلم بما قد يحدث
هذا ما قصدت
تحياتى لك مايكل
..
Ahmed taher
انا احب اولا اشكر متابعتك اللطيفه
والله عندك حق
النفس امارة بالسوء ولكن
اذا اعتمرت النفس بالايمان وحب الله والسير على نهجه ما ضلّت ابدا
وما ضللنا معها
تحياتى لجميل الكلام منك
ويارب تشرفنى دايما بزيارتك
هل الخطاب موجه الى نفسك ؟ او روحك ؟؟
احسست بذلك
دي اكيد روحك
بس حلوة اوي
شكلك كده يا رانيا انضميتي لجماعة الاخ ابراهيم معايا..
بتاع انا وانا..
حلو اوي البوست ده..
الجمل جميلة جدا وصادقة
و ملحوظة واحدة علي جملة
"تجفف بسعة قلبها ما ادماه قلبي الجريح"
متهيالي انها محتاجة مراجعة لغوية لكلمة ادماه
لانه والله اعلم ان القلب النازف هو القلب الدامي وليس القلب المدمي
شوفيها كده يمكن اكون غلط
تحياتي
وعلي فكرة اللعبة لسه شغالة انا بس عايز العب علي رواقة
سلام
رانيا
أميرة المدونين والمدونات مرة واحدة
دى شهادة أعتز بيها بجد من مدونة عظيمة زيك
انا لقيت أهل جداد بينكم وعيلة جديدة معاكم
اشكرك
سلام ازيك؟
هو انا كنت بس عايزة أسأل انتي بتتكلمي عن مين؟
عن نفسك ولا صديقتك ولا مين بالضبط؟
لكن على أي حال
الكلام جميل جدا
ومؤثر جدا
تحياتي
تنهض
تجفف بسعة قلبها
ما أدماه قلبى الجريح
انهض معها
نلملم ما بقى من رفاتى
وتدفعنى لأن
نستمر00من جديد
حلوة أوى.. حلوة بجد
الله بجد
انا مجتش هنا ازاي قبل كده
ايه الإبداع ده
أظل هناك طويلا000أغتسل بصدق دمعها
أتبرأ بحسرتها من خطاياى
أمسح بندمها الشجىّ أثار شجنى
تجديد في العبيرات
احاسيس صادقه
قمه في الروعه
إن شاء الله اكون ضيف دايم هنا
ويا رب مكنوش ضيف رخم
تحياتي
رانيا لو ده حقيقي... يبقي إنتي عملتي زيي.... أنا كمان دخلت جوه نفسي... إخترت الإختيار ده بكامل إرادتي... بطبطب عليها... بعمل معها زي ما بتعملي.. إخترت إن رحاب تكون جوه رحاب... أراحني جدا هذا الإختيار... راحه غريبه وسلام نفسي غريب .. كنت أظن أنني غريبه... ولكن وجدتك تعبري عما يدور بداخلي بإبداع... من الممكن أن يكون سكوني داخل نفسي مؤقت لحين أن أجد نفس أسكن إليها
معلش طولت عليكي... بس الموضوع مسني شخصيا أوي أوي
سلامي ليكي يا رانيا
شكرا للتوضيح يا رانيا و أحييكي كمان مره ع البوست
تحياتي لكي
Sharm
وقد صدق احساسك
تحياتى لك
نورهان مفيد
اهلا بيكى فى مدونتى
تقدرى تقولى هى نفسى او روحى او ضميرى او اى شىء يصدق معى
سعدت بمشاركتك ويارب دايما منورانى
yamen
حاشى لله ان انضم لاية جماعه
وادينا فى داهيه بقى
:)
وطبعا يا أستاذى ملحوظه فى محلها
بس تعرف ممكن نمشيها بطريقة فهم تانيه
القلب المدمى هو القلب الجريح الذى ينزف
القلب الدامى هو القلب الذى يجرح الاخرين فينزفوا
فقد يكون سهل على انفسنا ان تجفف جراحها الشخصيه
ولكن من الاصعب فى اعتقادى ان تساعدها على
ان تسامح نفسها لما اقترفته من جراح للاخرين
حاجه كده زى ما قلك يحيى الرخاوى
تجلياتن الشعور بالذنب
اصلى بحاول ابقى النوع التالت
ساعة الحساب مع النفس
:)
او زى ما اقلك صلاح جاهين
معجبش من اللى يطيق بجسمه العذاب واعجب من اللى يطيق يعذب اخوه
فبحاول ان اخلى نفسى تسامحنى على الجراح التى سببتها للاخرين
ايه رايك وأدى تأويل تانى للجمله
:)
أى خدمه
وطبعا أنا منستش اللعبه ومستمره فيها وعلى أقل من مهلك خد وقتك وروق ويلا نكمل واما نشوف مين اللى هيغلب
:)
وطبعا أشكرك على الكلمتين الجامدين اللى فى الاول بتوع بوست حلو وكده دى شهاده اعتز بيها من أستاذى
تحياتى
لك
ياسمين
اه طبعا مش اميرتهم ده انتى كمان ملكتهم المتوجه
الناس كلها بتحبك وبتشكر فيكى وانتى بصراحه انسانه جميله ورقيقه وتستهلى
يمكن ماعرفكيش شخصيا بس واضح من حب الناس ليكى وكمان كتاباتك انك فعلا تستحقى كده
وفعلا انا حاسه اننا عيله واحده
عيله بتعرف اهم جزء عن بعضها
اللى هو الاحساس
كل واحد بيعبر عن نفسه فى كتاباته
فبكده بنعرف اجمل جزء عن بعض
وهكرر دى شهادة كل الناس عنك
وان شاء الله يجمعنا لقاء عشان اعرفك شخصيا
تحياتى لك
ايتها الملكه
شهيدة
أنا الحمد لله تمام
أنا بتكلم عن نفسى التى هى أقرب صديقه لى
وطبعا متشكره على وقك ومجاملتك
تحياتى لكى
dead man
أهلا بيك فى مدونتى
أسعدنى رأيك كما أسعدتنى زيارتك
يارب دايما منورنى
تحياتى الى الرجل الميت الحى
proid
اهلا بيك فى مدونتى
أزاى فعلا مجتش هنا قبل كده؟
:)
عموما مافتكش كتير اهلا بيك فى اى وقت
طبع مش عارفه اقللك ايه على كلامك الجميل
وطبعا ارحب بوجودك كصاحب مدونه مش مجرد ضيف
اشكرك مره تانيه على كلامك المجامل
ويارب منورنى دايما
تحياتى
reri
رحاب العزيزه
أنا بحاول فعلا أعمل كده من فتره لفتره
أما أحس أنى مش أنا
وأنى بعدت أوى عن حقيقتى
أو اما احس انى لازم اتغير عشان اتماشى مع اللى حوليا
فبجى انفرد بنفسى واخد وادى معاها
طبعا انتى مش غريبه لانك اما تحاسبى نفسك ده فى اعتقادى شىء كويس وبيريح اوى
وبالنسبه للنفس التانيه اللى انتى عاوز تسكنى اليها
مش عارفه هل ممكن الواحد يلاقى نفس تانيه يسكن اليها بجد
ولا ده صعب
مش عارفه
عموما ربنا يكرمك وتلاقيها
انتى مطولتيش ولا حاجه بالعكس كلامك فعلا جميل واثر فيا
بجد يا رحوب وجودك عندى بيفرحنى
ربنا يديمه
واهلا بيكى فى اى وقت
تحياتى لكى رحووووب
micheal
أى خدمه
أنا اللى بحيى نفسى على وجودك ومتابعتك اللى بتفرحنى
تحياتى لك يا مايكل يا مشجعنى
أحسن حاجة أن الواحد يكون متصالح مع نفسه وفاهمها كويس
بتتكلمى عن نفسك اكيد
ولا عن احد اصدقائك ؟؟
بتهيالى نفسك
معرفش ساعات كتير بحس ان صعب الواحد يبقى فى سلام مع نفسه دايما بيبقى فيه صراعات بينى و بينها
يمكن علشان مختلفين شويا بس لو متفقين ان شاء الله هيبقى الموضوع اسهل بكتير
القصيدة رائعة جداا
v
تجسيد رائع
لوصف الحياة مع الذات
.
.
.
كثيرا ما ننسى أنفسنا
في دنيا الحياة
تحياتي
معقول؟
معقول كل شئ جميل هكذا؟
الكلام جميل
المشاعر جميله
الاحساس جميل
التعليقات جميله
الردود على التعليقات جميله
و
الصديقه جميله
اهو سحر يجعل منطقتك لا يقربها الا الجمال؟
ام هو جمالك الذى غلب كل ماعداه فجعله جميلا
مدحك المادحون بما انتى أهل له
واود ان امدحك اضعافا
فتقبلى منى تحياتى واعجابى الذى لا ينتهى
bos bos
اه والله فعلا
احسنتى قولا
تحياتى
Ma-3lina
انا فعلا بتكلم عن النفس
وعلى فكره كلنا بنختلف كتير معها لانه صعب جدا دوام الوفاق
واحيانا لازم انتى تخصميها وتبعدى عنها لكونها امارة بالسوء
اسعدنى اطراءك على خواطرى المتواضعه
فهى للتوضيح ليست بقصيده
تحياتى لكى
مجهول
؟
اسعدنى مرورك
تحياتى
shermen
اهلا بيكى فى مدونتى
صدقتى
كثيرا ما ننساها فى دنيا الحياه
دنيا الحياه؟مصطلح جديد علىّ
تحياتى
harmless
معقول فى حد مجامل بالشكل ده ؟انت حسستنى بنفسى
اسعدتنى كلماتك الرقيقه ومدحك المجامل
وتقبل منى ألف تحيه
ويارب منورنى دايما
الحياة بتنسينى نفسنى ومين احنا اصلا هو احنا لسى موجودين او بنعيش ولا بس بناكل ونام ونتنفس وبس
المهم دايما نفوق ونفتكر ايامنا الجميلة ونعمل صفاء داخلي مع نفسينا
وعلى ما اظن انت قادرة تعملي كدة
شكلك طيبة وحنينة موت
يمكن دى بسبب مشاكل ليك بس خليكي على طبيعتك
بالتوفيق وابقي زوريني
جميله اوى ... دايما بحس نفسى الملاك اللى بيوجهنى..وساعات احس انى صعبان عليها اللى بيجرالى وساعات برضه بلاقيها تقوللى اجمد واثبت وجميل اوى لما قولتى اغتسل بصدق دمعها لانها زى ما قولت بحسها الملاك اللى بيوجهنى دايما لو ظلمت حد او قسيت على حد او حتى حد قسى وظلمنى
اهنيكى على كلاماتك
احيانا تحتاج الصداقة واحيانا تحتاج المجاهدة والتغلب عليها
احيانا تحتاج الدفع
واحيانا تحتاج عراقيل
Lemonada
اهلا بيكى فى مدونتى
فعلا الحياه بتخلى الواحد ينسى نفسه
وينسى حاجات كتير
ربنا يقدرنا ونقدر نصفيها من وقت لوقت
وميرسى اوى على كلماتك دى
وطبعا انتى عارفه ان الحياه مليانه مشاكل
بتخنقك احيانا والكتابه بتخلينى اطلع نوعا ما منها
وعلى فكره انك تبقى على طبيعتك اجمل حاجه حتى لو البعض متقبلهاش
لانك لو حاولتى تتغيرى عشان حد تانى الخساره هتبقى اكبر
هتخسرى نفسك الى مفيش حاجه تعادل اكتسابها
ويارت كمان التغيير ده هيرضى كل الناس هتلاقى بردو مجموعه تانيه مش راضيه
منورانى جدا يا جميله وان شاء الله هكون من زائراتك الدائمين
تحياتى لكى
مداح القمر
اهلا بيك فى مدونتى
على فكره انا قريت تعليقك اللى انت كتبته قبل ما تمسحه وكان عجبنى اكتر
:)
بس طبعا تعليقك ده كمان جميل ومشجع
ويارب تفضل نفسك ملاكك الحارس على طول
وقبل ان القى تحياتى كنت عاوزه اسئلك
انت ليه مسحته؟
عموما اهلا بتعليقاتك على اى موضوع قديم لانى بتابع مواضيعى القديمه كمان
وده دليل انى قريت تعليقك قبل ما تمسحه
:)
تحياتى لك
كراكيب عادل
صدقت
فهى ايضا أمارة بالسوء
تحياتى لك
تحياتي يا رانيا ..
أتخنق لو جيت أتكلم في بوست جميل اوصل متاخر بعد ما اتقال فيه كلام كتير .. لكني باتابع النت بالعافية يوم في او اتنين في الاسبوع ربنا يرحمنا من المذاكرة والامتحانات .. المهم كلامك الجميل.. "أظل هناك طويلا000أغتسل بصدق دمعها
أتبرأ بحسرتها من خطاياى
أمسح بندمها الشجىّ أثار شجنى " ... جميل أن نرتد الي نفوسنا لنسكن اليها .. لنرتمي فيها ونتباحث معها و نقيم أمورنا وأوضاعنا و أفعالنا من آن لآخر .. نكاشفها وتكشفنا .. و يغسل ندمها خطايانا .. عودة الانسان لذاته و مكاشفته ذاته و الوقوف معها في حد ذاته .. شئ رائع قلما يوجد هذه الأيام .. لكن هل كلنا يمكنه هذا.. لو كانت أرواحنا بحاجة الي تهذيب و ترويض .. لو كانت قاسية أو متذمرة .. حاقدة أو نرجسية النزعة .. هل ستكون دليلا طيبا ..هل ستبرانا من خطايانا وتغسلنا بصدق دمعها .. أقصد القول أن كثيرون ربما يواجهون أنفسهم و يبحثون معها أمورهم و أفعالهم .. لكن من تساعدهم علي العودة و الانتعاش من جديد يملكون أصلا روحا علي قدر من النقاء و الجمال و الاحساس الشفاف .. علي أنها أحيانا تطاوعنا علي أهوائنا حتي لا نشرد منها.. و لربما كان هذا رفقا منها بنا أحيانا..حتي لو قصدت الابتعاد الي ما وراء القسوة و الحقد و التذمر و الانانية .. ليس الجميع .. البعض يجد هذه الاشياء مهما ولي وجهه و ابتعد و البعض يستسلم أو يتقاعس عن تحويلها
"أجد فيها عزائى عما أراه وأعيشه
وأرفضه " .. خيل الي أنها كالنشاز .. لربما كانت ونيسا لكن هل يمكن أن تجدي معها العزاء... لك تحياتي
اشكرك للتهنئة بعيد ميلاد جنى الجميلة
مش هتنزلى بقى بوست جديد يا رانيا؟؟
مستنية البوست الجديد
ايه دا بجد؟ دا انا يادوب كتبته ومسحته فى دقيقتين
انا مسحته لانى بصراحه ساعات فعلا بتعجبنى حاجه واتكلم عليهاوببقى طاير بيها ودى حاجه يمكن بتخلى بعض الناس يقولوا معقول للدرجه دى؟اكيد دا بيجامل او بيبالغ مع انى بحب الحاجه الجميله وبفرح لما بلاقى حاجه جميله وبتاخدنى وبتأسرنى حقيقى... لكن بلاقى رد فعل الناس احيانا ان انا بجامل وببالغ وكلام فاضى بيخلينى افكر الف مره قبل ما اقول كلمه حلوه وخصوصا انها كانت اول مره ادخل فيها عندك
انتى ايه رأيك؟ كان باين عليا بجامل وببالغ من كلامى اللى مسحته؟؟
Yosif
لا متتخنقش ولا حاجه لانك اما تقول رايك حتى ولو مشابه ممكن يؤكد فكره او يمحو اخرى
ومن غير اية مجاملات تحليلك بيعجبنى وباحترمه جدا حتى لو اختلفت معايا
انت فعلا نبهتنى لسؤال كان بيمر عليا من وقت لاخر
الناس اللى بتعمل حاجات اقل ما توصف به
بالشر
هل لا يأنبوا انفسهم
هل لا يبالوا بما يفعلون؟
فى راى ان الانسان يعرف الخير من الشر
واعتقد انه لايوجد انسان على وجه الارض لم تحاسبه نفسه او ضميره ولو للحظات
ولكنها ايضا قد تيسر وتحلل له
الطريق الخاطىء
وبالنسبه لسؤالك
اعتقد انك ممكن ان تجد فيها ايضا الونيس لانه فى ظل العالم الذى نحيا
احيانا لاتجد رفيق وصديق يرشدك ويعزيك عما تجده
الا هى
نفسك
مقدره مرورك وتعليقك الوافى
فى ظل امتحاناتك
وربنا يكرمك فى الامتحنات
تحياتى يوسف ويارب منورنى دايما
ياسمين
شكرا على ايه بس ياريت كنا نقدر نعملها عيد ميلاد على البلوج
وتورته بقى وبلونات وكده
:)
بالنسبه للكتابه ادعيلى بس تتفك عقدة الكى بورد
بجد يشرفنى اهتمامك ومتابعتك ياسمينا العزيزه
تحياتى
مداح القمر
اه اصلى بالصدفه دخلت لاقيت التعليق
و مفيش دقيقتين لاقيت تعليق من نفس الشخص باسلوب تانى
وبالنسبه لموضوع المجامله
على فكره بتتحس
اما التعليق يبقى مجامل او لاء
كله بيتحس
ولو كنت حاسه انها مجامله مكنتش قلتلك انه عجبنى
ومع كل احيانا بكتب شكرا على مجاملتك نوع من انواع المجامله فى رد التعليق
:)
عموما انت منورنى ويارب دايما
تحياتى
هو انا كل ما ادخل مدونة الاقي كلام جميل كده
رموز رموز رموز
ده حتى انا مش عارف انتي اجزمتي بانها نفسك او روحك ولا لسه
جميلة الحيرة دي
يمكن ويمكن
بس اكيد اكيد
ممتازةارتقاء مرة اخري:-)
نقي هو احساسك
ونقي هو قلبك
والقادم دائما افضل
آخر بوست في القصة نزل خلاص
إذا حبيتي تعلقي
تحياتي
أنتظر جديدك
متشكر لمرورك على مدونتى اتمنى ان تتابعينى ... عادة اضيف لينك لمعظم زوارى فى مدونتى واوعدك باضافة لينك اول ما ابدا التعديل فى المدونه وانا اتوسم فيك الخير
اخبارك اية؟
فين الجديد
اوروفوار
فينك ؟؟
أحمد سلامة
اه فعلا الرموز بقت كتير بس مش هتبقى بنفس قوة الرمز اللى بتستخدمها
اسعدنى حقا رايك
ويارب منورنى دايما
تحياتى
مكتبة نيرفانا
اهلا بيكى فى مدونتى
انا متشكره على مدحك لكلماتى ولقلبى
ويارب تنورينى دايما
تحياتى لكى
shermen
انا فعلا دخلت
وبالنسبه للجديد فانا ايضا فى انتظار كتابته
اشكر متابعتك واهتمامك
تحياتى
حزين
اهلا بيك فى مدونتى
ان شاء الله هكون من متابعينك
واشكر مرورك وتوسمك الخير فيما اكتب
تحياتى
bastokka طهقانة
اولا متشكره على متابعتك اللى فعلا اسعدتنى
وبالنسبه للجديد ان شاء الله اقدر اكتب قريب
تحياتى
كراكيب عادل
اسفه على التاخر بس انت اكيد
عارف الكتابه دى محتاجه جو معين
يلا دعواتك
متشكره جدا على السؤال والمتابعه
تحياتى
إرسال تعليق